នៅថ្ងៃសុក្រ ២កើត ខែមាឃ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៥ ខែមករា ឆ្នាំ២០២១ លោក ទ្រី សុភក្តិ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តក្រចេះ រួមជាមួយក្រុមការងារនៃមន្ទីរធនធានទឹក និងឧតុនិយមខេត្ត ព្រអាជ្ញាធរក្រុង សង្កាត់ បានអមដំណើរឯកឧត្តម​ ហឿ ស៊ីយ៉ែម ប្រធានក្រុមប្រឹក្សាខេត្តក្រចេះ ចុះពិនិត្យស្ថានភាពដំណាំស្រូវស្តារឡើងវិញ លើផ្ទៃដីខូចខាតសរុបចំនួន ១៧០៤,៥៧ហិកតា ក្រោយទទួលរងការខូចខាតដោយទឹកជំនន់ដែលទទួលបានពូជស្រូវសរុបចំនួន ២៣៧ ២០០គីឡូក្រាម ពីគណៈកម្មាធិការជាតិគ្រប់គ្រងគ្រោះមហន្តរាយ កាលពីខែវិច្ឆិកា ឆ្នាំ២០២០ កន្លងមក មានដូចខាងក្រោម៖

កម្មវិធីទី១៖

ចុះពិនិត្យស្ថានភាពដំណាំស្រូវនៅសង្កាត់អូរប្ញស្សី ក្រុងក្រចេះ ដែលមានផ្ទៃដីខូចខាតចំនួន​ ៥៧,២០ហិកតា ស្មើនឹង ៦៥គ្រួសារ ត្រូវបានស្តារឡើងវិញ១០០%។

កម្មវិធីទី២៖

ចុះពិនិត្យស្ថានភាពដំណាំស្រូវនៅសង្កាត់រកាកណ្តាល ក្រុងក្រចេះ ដែលមានផ្ទៃដីខូចខាតចំនួន​ ៨,២០ហិកតា ស្មើនឹង ១២គ្រួសារ ត្រូវបានស្តារឡើងវិញ១០០%។

តាមការចុះពិនិត្យជាក់ស្តែង ស្ថានភាពដំណាំស្រូវមានប្រភពទឹកស្រោចស្រពគ្រប់គ្រាន់ ធ្វើឲ្យស្រូវមានការលូតលាស់ជាធម្មតា បច្ចប្បន្ន​ដំណាំស្រូវទាំងនេះបានឈានដល់ដំណាក់កាលចេញផ្កា ហើយនឹងអាចប្រមូលផលក្នុងរយៈពេលមួយខែខាងមុខទៀត។ តាមការវាយតម្លៃដំណាំស្រូវទាំងនេះនឹងអាចទទួលបានទិន្នផលជាមធ្យមប្រមាណពី ៤,៣០០គីឡូក្រាម ទៅ ៤,៥០០គីឡូក្រាម ក្នុងមួយហិកតា។

បន្ទាប់មកទៀតឯកឧត្តម និងក្រុមការងារបានបន្តចុះពិនិត្យទំនប់បង្ហៀរទឹក ដែលសាងសង់ដោយមន្ទីរធនធានទឹក និងឧតុនិយម តាមគោលដៅនីមួយៗ និងបានផ្តាំផ្ញើដល់កសិករ ខិតខំបង្ករបង្កើនផល ជាពិសេសទប់ស្កាត់នូវការរីករាល​ដាល​នៃជំងឺ កូវីត ១៩ (COVID-19) ក្នុងឆ្នាំ២០២១នេះ ផងដែរ។